La Xunta pola Defensa de la Llingua Asturiana (XDLA) presenta l’Informe sobre l’incumplimientu de la toponimia oficial na rede de ferrocarril d’Asturies, un documentu qu’analiza los nomes de les 207 estaciones de ferrocarril asturianes y cómo ADIF —empresa pública estatal alministradora de la rede—, RENFE —empresa pública estatal esplotadora de la rede— y CTA —Consorciu de Tresportes d’Asturies, entidá dependiente del Gobiernu d’Asturies—, nun respeten la llegalidá toponímica.

Esti informe unvióse a los responsables d’ADIF y RENFE, amás d'a miembros del Gobiernu asturianu, tanto de la Viceconseyería d'Infraestructures, Movilidá y Territoriu como de la Conseyería de Cultura, Política Llingüística y Turismu. La reclamación de que s'use la toponimia oficial ye una reivindicación vieya de la XDLA, tanto en campañes como en presentación d'escritos y quexes a entidaes privaes y públiques. Ye inaceptable que nun Estáu de derechu los organismos públicos nun respeten a sabiendes la llegalidá.

Esti informe fai un análisis llinia por llinia, estación por estación, onde puen comprobase los nomes actuales de toles estaciones y el so nome oficial, que tendría que ser l’únicu que s’usare. La base llegal d’esti informe ye clara: la Llei 1/98 de 23 de marzu d’Usu y Promoción del Asturianu (BOPA del 28 de marzu de 1998) y los dos decretos del añu 2002 que regulen el procesu actual de normalización toponímica —38/2002 de 4 d’abril pol que se regula la Xunta Asesora de Toponimia del Principáu d’Asturies (BOPA del 19 d’abril del 2002) y 98/2002 de 18 de xunetu pol que s’establez el procedimientu de recuperación y fixamientu de la toponimia asturiana (BOPA del 23 d’agostu del 2002)—, amás de los correpondientes decretos de cada conceyu publicaos nel BOPA a lo llargo d'estos últimos 15 años. A pesar de la claridá llegal nesti tema, la toponimia oficial d’Asturies incúmplese sistemáticamente nos avisos sonoros de los trenes, nes señales d’andenes y estaciones, nos cartelos y paneles d’horarios y nes redes sociales, páxines webs y aplicaciones móviles de RENFE, ADIF y CTA.

La XDLA pidió aconceyar coles autoridaes competentes pa falar sobre esti informe y conocer les midíes que se van tomar pa solucionar una situación que nun pue allargase más nel tiempu, más tovía depués de conocer que la intención del Executivu asturianu ye rematar el procesu d'oficialización de la toponimia tradicional enantes d’acabar el 2022.