A les 20:00 hores d’esti xueves 10 de payares, el Centru de Referencia de la Cultura y la Llingua Asturiana va acoyer la charra de Benigno Delmiro Coto Lliteratura y mina. Esti actu enmárcase dientro de la programación de les xornaes culturales De castilletes y Carbón qu’organiza l’Ayuntamientu de Llangréu en collaboración cola Fundación Nuberu y que vien desenvolviéndose tolos xueves d’esti mes y que van rematar con un conciertu del grupu Nuberu’l próximu 4 d’avientu, día de Santa Bárbara.

Benigno Delmiro Coto nació en L’Entregu y ye llicenciáu en Filoloxía Hispánica pola Universidá d’Uviéu, doctor en Filoloxía pola Universidá de Zaragoza y catedráticu d’Educación Secundaria. Especializóse en lliteratura minera, materia na que tien publicao una montonera artículos y el llibru Literatura y minas en la España de los siglos XIX y XX. Anguaño ye profesor de de llingua y lliteratura nel IES de Llanera, pon cursos de formación continua del profesoráu y dirixe talleres lliterarios.