Asturies.-L’escritor y profesor entreguín llogró la eleición por unanimidá na votación que constituyó l’únicu puntu del orde del día de la Xunta Estraordinaria de l’Academia de la Llingua Asturiana (ALLA), desendolcada’l xueves 10 de setiembre nel llar uvieín de la Institución.El so currículu lliterariu, de primer nivel, ta compuestu d’obres de gran valir nos tres grandes xéneros, lo que-y fixo collechar bien de premios del mayor prestixu igual en narrativa, qu’en poesía y en teatru.
Amás del so llabor creativu, la Xunta Estraordinaria de l’ALLA quixosorrayar la importancia de la so contribución pedagóxica, que vien exercitando nel ámbitu regláu como profesor funcionariu de Secundaria y tamién como docente, dende cuantayá, de la Universidá Asturiana de Branu. Poro, y pol so espíritu de collaboración permanente, l’Academia nun quier dexar de reconocer la so fidelidá incondicional a la Institución.
Pablo Rodríguez Medina va recibir solemnemente la so nueva condición d’Académicu Correspondiente de l’ALLA nel Día de les Lletres Asturianes, qu’esti añu va celebrase nel Aula Magna de la Universidá d’Uviéu, el 2 d’ochobre, nun actu restrinxíu y afayáu a les condiciones hixénico-sanitaries anguaño imperatives.
