Alberto Vázquez gana’l XII premiu Alfonso Iglesias de Cómic en llingua asturiana cola obra El sol na escombrera   -        El xuráu destaca el “enfoque realista, la propuesta sobria y el dibuxu personal y característicu” del autor, que narra nel so trabayu la vida d’un neñu de la guerra asturianu

Asturies.-La obra El sol na escombrera, del creador Alberto Vázquez, llevó’l Premiu Alfonso Iglesias de Cómic en llingua asturiana d’anguaño, falláu ayeri n’Uviéu. El dibuxante mierense yá ganare’l gallardón na so novena edición col títulu Los llazos coloraos.   El xuráu, que valoró “la variedá y l’interés” de tolos trabayos presentaos, destaca “l’enfoque realista y la propuesta sobria” de la obra ganadora, que narra la vida de José Fernández Sánchez, un neñu asturianu de la guerra, “un tema mui poco tratáu nes artes visuales”, según puntualiza l’acta de la deliberación.  

El fallu señala tamién la calidá de “un estilu de dibuxu característicu y personal, yá afitáu”, y la ellaboración tan brillante d’una obra “envuelta nun tonu de señardá qu’espeya a la perfección el de les alcordances del protagonista”.   Alberto Vázquez (Mieres, 1969) ye un artista gráficu, dibuxante, cortiumetrista y documentalista, autor d’obra tan reconocida como la mentada Los llazos coloraos, y los documentales 1962. La lluz que vieno del corazón, 1965. Asaltu a la comisaría de Mieres o 1934-1935. Diez asturianos nel exiliu francés. Vázquez ye tamién autor de munches tires cómiques en medios periodísticos asturianos.  

El xuráu del premiu, que ta dotáu con 5.000 euros, tuvo presidíu pol director xeneral de Política Llingüística, Antón García, y formáu pola escritora Mariluz Pontón, la profesora Tamara Collar, la dibujante Raquel Lagartos, la historiadora del arte Mercedes Menéndez, el creador Ruma Barbero, ganador de la última edición del gallardón, y Juncal García, qu’actuó como secretaria.