El folk de Felpeyu y la electrónica-folk de Fruela 757 suena nel quintu conciertu d’Amosando
El Toma3 de Xixón acueye’l 6 de setiembre la grabación d’esti ciclu de conciertos en formatu íntimu, grabaos y emitíos per Internet
El folk acústicu y la electrónica parez que nun tienen nada que ver, pero na música siempre hai puntos d’alcuentru. La reellaboración de la música tradicional asturiana ye la seña d‘identidá de Felpeyu y Fruela 757, anque cada proyectu dende una óptica mui estremada. Dambes visiones van quedar rexistraes na nueva grabación d’Amosando, el ciclu de presentaciones de discos entamáu por musicasturiana.com, con un formatu ente conciertu acústicu con aforu reducíu, programa de televisión y alderique.
Felpeyu ye ún de los grupos más importantes de la música asturiana. Lleven cuasi 30 años reellaborando los sones tradicionales d’Asturies al traviés del so estilu folk acústicu y atlánticu. Con conciertos en 14 países y 4 continentes, a finales de 2017 asoleyaron el so quintu discu 'Cerquina', un trabayu esquisitu que da un pasu más nel procesu de recuperación y dignificación de la nuestra cultura.
Fruela 757 ye una de les propuestes más orixinales de la música'l país. Nel so repertoriu suena Reggaetoná, Hipfolk, DrumAmbás... o lo que ye lo mesmo, música popular asturiana amestada a los soníos urbanos internacionales del sieglu XXI. ‘Llariegu’ ye'l so nuevu y sestu trabayu, qu'homenaxea al pop llariegu al traviés d’electrónica y otres músiques contemporánees pa la danza.
La llibrería-café Toma3 de Xixón va acoyer esta grabación a les 17.00h del domingu 6 de setiembre. La entrada ye de baldre pero’l so aforu ta llendáu a les persones que ganen una invitación participando nun sortéu al traviés de les redes sociales de la tienda online y distribuidora dixital musicasturiana.com, organizadora del eventu xunto col realizador audiovisual Javier Lueje y Goxe Producciones. Amosando tien el patrociniu de la estaya de Turismu del Ayuntamientu de Xixón y de la Fundación Caja Rural de Asturias.
8 conciertos publicaos
Amosando nació en 2019 como una iniciativa pionera n’Asturies que bebe d’otres esperiencies asemeyaes exitoses notres partes del planeta y que tien l’oxetivu de visibilizar a la música asturiana dientro y fuera de les nuestres fronteres, amás de ser una ferramienta promocional adaptada a les formes actuales de consumir música. Los sos videos suman más de 100.000 reproducciones entre YouTube y Facebook y nos conciertos yá actuaron L-R, Xaime Martínez, Ún de Grao, D’Urria, Anabel Santiago y Eva Tejedor & Les Pandereteres, Cerezal y Silvia Quesada.
