L’Archivu de la Tradición Oral d’Asturies “ta nuna situación llamentable”, denuncia Rafael Palacios. El diputado de Podemos Asturies critica al Gobiernu asturianu por aportar “cero euros” a un bien inmaterial que cuenta col reconcimientu internacional d’una montonera d’organismos de prestixu y de la comunidá científica. Jesús Suárez López, responsable de esta institución, asegura que “si nun hai sofitu por parte de les instituciones, voi llevar l’archivu pa México”

Podemos Asturies ta acabante alertar de la penosa situación que vive hoi l’Archivu de la Tradición Oral d’Asturies como consecuencia de la dexadez del Gobiernu asturianu nos últimos años. El diputado Rafael Palacios compareció esti miércoles xunto con el responsable del archivu, Jesús Suárez López, pa denunciar y poner en conocimientu de la sociedá asturiana “la llamentable situación” pola que ta pasando un proyectu que lleva más de trenta años d´andadura y que tien como oxetivos la documentación, salvaguarda y difusión del patrimoniu inmaterial y oral d´Asturies, “y qu’hoi cuerre´l riesgu de desapaecer”, aseguró el diputáu moráu.

Palacios recordó que l’Archivu de la Tradición Oral d´Asturies, a pesar de tar reconocíu internacionalmente por organismos de prestixu y del ámbitu de la investigación, “sobrevive malpenes pola absoluta falta d´apoyu institucional del Gobiernu d´Asturies, que tanto en términos presupuestarios como loxísticos o d´infraestructures aporta cero euros”. Nesa llínea, Palacios manifestó qu’esti fondu documental de valor patrimonial incalculable “tan en riesgu seriu d’escaecese y perdese pa siemrpe, o vese obligáu a emigrar a México como lo ficieren tantos y tantes asturianes”. Si esti llega a ser el casu “diba ser una una irresponsabilidá y dexadez imperdonable por parte del Gobiernu d´Asturies”.

Según adelantó el diputáu de Podemos Asturies, si l’Executivu de Barbón nun toma les midides oportunes “vamos poner en marcha toles iniciatives polítiques y parlamentarias que faigan falta col oxetivu de garantizar la salvaguarda y difusión de los bienes inmateriales existentes n´Asturies con valor cultural y con significáu pa la identidá y la memoria colectiva de los asturianos y les asturiaes, como ordena l´Art. 105 del Reglamentu de Desarrollu de la Llei del Principáu d´Asturies 1/2001, de 6 de marzu, de Patrimoniu Cultural”.Otra manera, Jesús Suárez López, mostró la so indignación col actual Gobiernu asturianu -y col anterior- pola so falta d’apoyu “a una ayalga que s’oculta a los asturianos”. “Resulta incomprensible qu’una institución como l’Archivu de la Tradición Oral d’Asturies, que ta avalada pola comunidá científica internacional, tea hoi en riesgu de desaniciu pola absoluta falta d’apoyu institucional del Principáu d’Asturies, y más por parte d’un equipu de Gobiernu qu’enarbola la defensa de la llingua y la cultura asturiana como estandarte d’acción política”, criticó Suárez quien, amás, quiso llanzar una pregunta a la Conseyera de Cultura, Berta Piñán, sobre ““si esiste dalguna previsión pa facilitar l’accesibilidá pública de los fondos documentales d’esti archivu a los investigadores y al públicu en xeneral” y “si va tomar dalguna midida pa garantizar la salvaguarda activa de los fondos documentales d’esti archivu y la tresmisión a les xeneraciones futures”.

Con too y con eso, Súarez López alvirtió a les instituciones asturianes de que “si nun se pon remediu a esta situación, con tol dolor del mio corazón, marcho col archivu pa México, onde m’ufiertaren seis meses d’estancia pa poner en marcha esto, y dende ellí difundir los llogros y les espublizaciones al restu del mundu”.Hai que recordar que l’Archivu de la Tradición Oral d’Asturies presenta un fondu documental de 1.000 hores de grabaciones sonores y audiovisuales con 30.000 entrevistes de tradición oral tres un trabayu de campu en 900 pueblos de 70 conceyos del país onde quedaron rexistraos cuentos, lleendes, salmos, conxuros, refranes o adivinances, amás de testimonios orales de la Guerra Civil o de los Neños de la Guerra, ente otros, siendo esti archivu la base del Atlas Sonoru de la Llingua Asturiana. 

El Laboratorio Nacional de Materiales Orales de Universidá Nacional Autónoma de México ufiertó les sos infraestructures y equipos técnicos pa la salvaguarda activa del fondu documental del Archivu de la Tradición Oral d´Asturies, argumentando que si bien ye cierto qu´esti cometíu correspuende de mano al Principáu d´Asturies, a la Universidá d´Uviéu y a la sociedá asturiana, tamién ye cierto que la relevancia científica d´esti corpus de tradición oral failu acreedor de la consideración de Patrimoniu Cultural de la Humanidá.D’esta manera, en reconocimientu al trabayu fechu pol Archivu de la Tradición Oral d´Asturies, 250 profesores, investigadores y especialistas d´instituciones y universidaes e instituciones d´una treintena de países suscribieron un manifiestu enviáu al Gobiernu d´Asturies, onde se pon de relieve qu´esti Archivu ye ún de los meyores embaxaores que la cultura asturiana tien nel mundo y solicítase que se-y dea estabilidá,  dignidá y los medios que merez pa que puea cumplir de manera más eficiente la so vocación de serviciu a la sociedad asturiana.