“Ye playa y ye prau / Ye de chigre y de mantel / Ye l’horizonte cercanu / Ye historia y ye vanguardia… / ¡Ye mundial! / Xixón en toles ocasiones”.

Con estos gabitos, y de la mano de Rodrigo Cuevas, que tamién aporta la música, Xixón quier afitase a la cabeza del Norte d’España p’atrayer al turista que busca reencontrase cola ciudá asturiana y caltener la imaxe de marca de Xixón como un destín atractivu, abiertu, hospitalariu... 

La campaña tien l’enfotu de recuperar l’interés de Xixón ente la xente que quiera faer una escapada o tomase unos díes de magar acaben las restricciones de movilidá y pensando en caltenela nes foles vinientes, como na seronda. La campaña va tar empobinada al mercáu nacional más averáu: Madrid, Castiella y Llión, Cantabria, Galicia, Navarra y Euskadi.

Toles creatividades fixéronse en castellán, asturianu, gallegu y euskera. Anguaño, y pola mor de la situación actual, na que la movilidá va tar llendada, la campaña tamién va empobinase al públicu llocal: Xixón y el restu d’Asturies. La campaña remanecerá güei y va tar activa tol branu, con especial incidencia a finales de xunu y entamu de xunetu, momento nel que se prevé que se faigan la mayor parte de les reserves. La campaña podría reactivase de cara a les pontes de la seronda. 

Rodrigo Cuevas y Xixón

El compositor ya intérprete asturianu Rodrigo Cuevas ye’l protagonista de la campaña. Rodrigo Cuevas ye un artista de sonadía tanto dientro como fuera d’Asturies. Tresmite, a la vez, esa autenticidá y singularidá que reflexa de Xixón como destín únicu, singular, estremáu, con una cultura fuerte y con calter, daqué básicu pa la promoción turística. Arriendes d’ello, xune na so imaxe la visión d’esi Xixón qu’avanza, que s’abre a mundos nuevos, modernu, pero siempres respetando les sos tradiciones. Son valores colos que los y les xixoneses s’identifican. Rodrigo Cuevas vencéyase muncho no tocante a valores colo que ye Xixón: asturiana, moderna, abierta, acoyedora, creativa, tresgresora, cosmopolita, artística, gayolera… Asina, esti nuevu spot amuesa duples de conceutos que s’asocien a Xixón: playa/prau; horizonte/cercanu; historia/vanguardia; chigre/mantel.

Los escenarios son la playa de San Llorienzo, el Puertu Deportivu, el Xardín Botánicu Atlánticu, la cai La Merced, Llaboral Ciudá de la Cultura, Llaboral Centru d’Arte, el Muséu del Pueblu d’Asturies, Llagar Trabanco, el restorán La Salgar y l’Eloxu del Horizonte, que nun podía faltar nel so 30 aniversariu. 

Espardimientu de la campaña

La campaña va distribuyise a nivel nacional en revistes de viaxes, como Viajes National Geographic, Traveler o Turismo Rural, y en suplementos de viaxes de los diarios nacionales más lleídos (El País y El Mundo). N’esterior, va faese publicidá en Metro de Madrid y de Bilbao, va vinilase un tranvía de Bilbao, publicidá nes estaciones de Renfe y mobiliariu urbano de les ciudades principales de Madrid, Castiella y Llión, Euskadi, Galicia, Navarra y Cantabria. 

La campaña online, que tará empobinada a eses comunidaes autónomes y a Asturies, va realizase en webs venceyaes con viaxes, diarios online, otros sites rellacionaos, en redes sociales (Facebook, Instagram y Youtube) y en plataformes de TV online: mitele y Atresmedia.