La Escuela de Doblaxe d'Asturies entama nel centru Xixón, na cai Libertad 12, un Taller de Doblaxe n'Asturianu. Ésti faise pensando naquellos/es que nun tuvieren contautu nengunu col mundu del doblaxe o namás tuvieren un contautu curtiu col mesmu.
L'oxetivu de los organizadores ye que los/es alumnos/es vayan afayándose nel doblaxe en llingua asturiana, de la que s’abre camín a futuros profesionales que puedan trabayar en proyeutos pa empreses del sector o pa la televisión autonómica d'Asturies*.
Pelo llargo la propuesta formativa van tratase elementos téunicos y humanos de la profesión, el métodu, la sincronía y el take. Amás, va trabayase dándo-y una importancia especial a la observación de la escena y de los actores, col envís de llograr una bona interpretación acordies cola versión orixinal. Tamién, va doblase material de xéneros estremaos (drama, comedia, musical...), d'animación y documentales.
El preciu del taller, pal que la matrícula va tar abierta hasta'l 20 de marzu, ye de 160 euros (120 € + 40 € matrícula). Va facese los díes 21 y 28 de marzu (sábados) en xornaes con sesión de mañana y tarde; de 11 a 13:30 hores (descansu de 30 minutos) y de 16:30 a 20:30 hores (descansu de 30 minutos).
N'acabándolu, dase certificáu acreitativu de la formación recibida al alumnáu que complete'l taller.
Profesor del taller: Humberto Gonzali
Inscripciones na web de la EDAS
*Wadjet Media tien fecho pa la TPA los doblaxes n’asturianu de «One-Eyed Jacks», «Dirty Harry», «Inception», «Ocean’s Eleven» y «Sherlock Holmes. A Game of Shadows».
