Si quieren reivindicar la nuestra cultura, que contraten pa San Mateo grupos musicales que canten n'asturianu

Depués de que la conceyala de Fiestes d'Uviéu, Covadonga Díaz Álvarez, afirmara que recuperar la figura de la Reina y Dames de les fiestes de San Mateo valía pa reivindicar les tradiciones, cultura y folclore asturianu -entendemos que pol fechu de que van dir vistíes col traxe'l país-, la Xunta pola Defensa de la Llingua Asturiana (XDLA) refuga que'l PP enmazcarite de reivindicación de la nuestra cultura midíes que cosifiquen la imaxe de la muyer.

Coles palabres de la conceyala Covadonga Díaz, el PP demuestra qu'entiende'l patrimoniu cultural asturianu dende unos parámetros decimonónicos y patriarcales, más propios de los Coros y Dances de la Sección Femenina que del procesu de recuperación qu'entamó n'Asturies nos años setenta del sieglu pasáu y que permitió que les nuestres tradiciones se recuperaren y llegaren hasta güei.

L'apoyu a la cultura asturiana supón midíes como que'l Conceyu d'Uviéu dexe d'imcumplir la Llei d'Usu y empiece a usar la toponimia oficial -ausente dende la llegada del PP y Ciudadanos al Gobiernu local-. Ye chocante que los que falen agora d'apoyu a les nuestres tradiciones son los mesmos que refuguen l'usu del asturianu y que tienen como única política llingüística'l monollingüismu en castellanu.

En definitiva, si'l PP quier usar San Mateo pa reivindicar la nuestra cultura, lo primero qu'habría que facer ye contratar a grupos musicales que canten n'asturianu p'actuar nes fiestes, da-y un sitiu dignu al nuestru folclor y alloñase d'un pasáu anacrónicu y tresnocháu impropiu d'unos tiempos onde la llucha pola igualdá ye protagonista. Pasiar a una muyer col traxe'l pais como si fuera un oxetu nun ye cultura asturiana; eso tien otru nome. Que nun usen el nome de la cultura asturiana pa eso.