Izquierda Xunida y PSOE van volver a entamar hoy los contactos de cara a un alcuerdu pa favorecer la investidura del candidatu socialista, Adrián Barbón, tres la xunta que tuvieron esta mañana y que, según la vocera d'Asturies pola Izquierda na Xunta Xeneral del Principáu, constata una “bona sintonía”.

“Hai bastante coincidencia no que ye lo programático” resaltó la diputada, quien esplicó que l'espíritu, per dambes partes, ye entendese pa “empezar a faer política”.

Respectu al sofitu d'otres fuerces de la izquierda a la investidura y a la posibilidá de qu'IX faiga de “mediador” a entrugues de los medios, Ángela Vallina, señaló que ye Podemos quien tien qu'empezar a entendese y a faer política. “Cuando pierdes les elecciones y otru saca munchos más diputaos que los que saquemos nós, pos, lóxicamente, hai que faer arrenuncios, hai que saber llegar alcuerdos y eso ye la política. Yo nun puedo, como perdedor imponer el mio programa al cien per cien. Hai que saber hasta ónde puede llegase y hai que trabayar pa la ciudadanía. Hai que recuperar un poco la política; nun ye too denunciar, protestar: ye trabayar por sacar coses alantre y, dientro de la fuerza que te dio la ciudadanía saber hasta ónde pues llegar”.