El 14 de xunu en L’Entregu y el 15 nel Parque d’El Florán de Blimea va celebrase esti eventu con 18 actividaes ente les qu’hai deporte, xuegos, talleres y música

L’asociación cultural Que Nun Apare! vuelve con más puxu que nunca y esti añu amplía’l so festival a dos díes de duración. El 14 y 15 de xunu, Samartín va acoyer la tercer edición d’esti eventu qu’axunta un total de dieciocho actividaes bien variaes rellacionaes col deporte, la cultura hip hop y reggae, les tradiciones asturianes, la música, los xuegos, y la educación. Too ello de baldre y pa tolos públicos.

El vienres 14 la Plazoleta La Ilesia de L’Entregu centra toles actividaes pa esi día. A les 18.30 arranca’l taller “Bombes de Semientes” con Güerta Escuela La Llera pa llueu dar protagonismu a la música con un pasucais d’Élite Charanga (19h), un conciertu del grupu folk Fontoria (21.30h) y la sesión de DJ “Dani Antistailo meets 33900 Vinyl Club” (23h).

Al día siguiente la diversión y la cultura nun va a parar nel Parque d’El Florán. De 12 a 20h hai xuegos hinchables pa neños y neñes, amás d’un mercáu d’asociaciones y artesanía, l’amuesa de graffiti y los xuegos y deportes tradicionales con 6 conceyos.  La bandina folk Cuatrolán va percorrer a la una’l mediudía les cais de Sotrondio y Blimea enantes de dar pasu a la sesión vermú-culete cola actuación de les pandereteres feministes Nun Tamos Toes.

Pela tarde arranquen les actividaes más rellacionaes cola cultura urbano. La sound system  –sistema de soníu de madera, ambulante y con orixe xamaicanu- del colectivu asturianu Allanái va facer qu’El Florán baille a ritmu de la música xamaicana mientres se dan los talleres d’ellaboración de xabones de llana con Trebeyos (17h) y “¿Qué ye’l Live dub mix?” con Riantz & Ovella Negra (18h). Amás, el programa radiofónicu Fat Sounds va emitir en directo dende les 17h y a les 17.30h el club La Güestia Roller Derby va facer una amuesa de Roller Derby, un deporte de contactu sobre patines orixinariu d’Estaos Uníos.

Los conciertos van ser de 20h a 00.30h y nellos van actuar el dúu de versiones Los Juanillous, los raperos La Ziega y Doris Escarlata y el Dj de música folk-electrónica Fruela 757. El ramu va ponelo la sound system, qu’hasta bien entrada la nueche va sonar cuntando cola participación nos micrófonos de los asturianos Allanái Crew, los vascos Airaldeko Sound System Dj Set + Ziztada Mc, los gallegos Ovella Negra y a la cantante de Pamplona Sistah Kata.

Mocedá, autoxestionada y con valores

Con esta nueva edición, Que Nun Apare! da continuidá al éxitu d'esti festival que nació en 2017 ol oxetivu d’enllenar el vacíu que dexó la non celebración de les tradicionales fiestes de La Llaguna. Una programación cultural y d'ociu diversa; poniendo en valor la interculturalidá, el papel de la muyer y la llingua asturiana; y na que la mocedá seya la protagonista; son les claves d'esti eventu autoxestionáu y ensin ánimu d'arriquecimientu que se celebra per tercer añu gracies al sofitu popular, al comerciu y la hostelería de Samartín, y a toles asociaciones, persones y artistes que desendolquen les actividaes.