"Ella Nun Escaez" ye un cantar sobre la memoria histórica al que'l grupu ska-punk pon-y imáxenes nesti videu
5 años de trayectoria, cuatro discos publicaos, milenta conciertos y delles xeneraciones baillando col so personal ska-punk amestáu al folk y reggae. Skama la Rede ye ún de los grupos más reconocíos del rock astur y tán acabantes de dar un pasu que teníen pendiente: grabar un videuclip.
El vienres 10 de mayu asoleyó na canal de YouTube de musicasturiana.com "Ella Nun Escaez", el nuevu cantar d'esti grupu en forma de videuclip. Rodáu pola productora xixonesa Cortexiphan, cunta la hestoria d'una muyer víctima de la represión na revolución d'ochobre 1934. 85 años dempués, la memoria sigue encesa y con esti cantar Skama la Rede faen alcordanza de toles persones que llucharon pola llibertá y la xusticia social.
La publicación d'esti videu enmárcase nes acciones que'l grupu lluanco-candasín-maliayu ta desendolcando pa cellebrar trés llustros de camín. Nos próximos meses van publicar trés cantares nuevos nes plataformes dixitales, amás de siguir cola xira 15 aniversariu que tien les próximes cites el 17 de mayu nel Festival da Máscara Ibérica (Lisboa) y el 29 de xunu nel Maizu Rock.
