Comprometémonos a plantear de nueves na Xunta Xeneral una reforma estatutaria pa oficializar l’asturianu y el gallego-asturiano  

Asturies.-Nesta Selmana de les Lletres Asturianes, nesti Día de les Lletres Asturianes, Podemos Asturies quier anunciar que la primer llei que’l nuestru grupu parlamentariu va llevar a la Xunta Xeneral na próxima llexislatura va tener como oxetivu una reforma del artículu cuartu del Estatutu d’Autonomía pa llograr, con tramitación urxente, la oficialidá del asturianu y del gallego-asturiano.

Esta ye una de les midíes que recueye’l programa electoral col que nos presentamos a les elecciones de mayu, d’acordies colo que venimos defendiendo nestos cuatro años nel Parlamentu asturianu, que nun ye otra cosa que’l reconocimientu de los derechos llingüísticos de toles asturianes y asturianos, yá seya’l castellanu, l’asturianu o’l gallego-asturiano l’idioma nel que decidan espresase y relacionase col so entornu. La reforma estatutaria ha de poner remediu a una situación dafechu incomprensible: que n’Asturies nun se cumplan los mandatos de rangu estatal y de rangu internacional pa garantizar la sobrevivencia d’una llingua que, como alvierte la Unesco, cuerre peligru d’estinción si nun se-y reconoz el status llexislativu y alministrativu que necesita y merez pa siguir formando parte del patrimoniu inmaterial asturianu.

Si de Podemos Asturies depende a partir del 26 de mayu, esi reconocimientu va ser real, inmediatu y efectivu; si queda en manes d’otres fuerces que namás ofrecen apoyu testimonial a esta necesidá probablemente nun vamos pasar de la declaración d’intenciones nin de los bonos propósitos. Valga como exemplu que mientres el PSOE asturianu diz que defende la oficialidá, el PSOE avilesinu tumba col so votu dalgo básico y fundamental como son les ordenances municipales d’asturianu. Nesti día de fiesta y de reivindicación llingüistica queremos espresar el nuesu compromisu con toles persones que reclamen el derechu a usar esti idioma o el gallego-asturiano con llibertá y con garantíes.

Esta tarde vamos salir de nueves a les cais d’Uviéu pa participar na manifestación qu’entama la Xunta pola Defensa de la Llingua Asturiana y nel actu que darréu va celebrar l’Academia de la Llingua Asturiana nel Teatru Campoamor.