Esti vienres 3 de mayu, a les 19.30 hores, Día de les Lletres Asturianes, la Xunta pola Defensa de la Llingua Asturiana, entama la tradicional manifestación pola oficialidá. La convocatoria va salir de la Estación del Norte d'Uviéu y va acabar énte'l Teatru Campoamor, onde va lleese'l discursu final.

"La oficialidá ye'l reconocimientu llegal del derechu que tien cualquier persona a usar llibremente la llingua propia d'un territoriu. La oficialidá ye un avance democráticu porque amplía derechos y llibertaes ciudadanes. N'Asturies tenemos dos llingües propies, l'asturianu y el gallego-asturianu, y los sos falantes nun tienen reconocíu llegalmente esi derechu. Si les nuestres llingües son como les demás llingües del Estáu, ¿por qué los sos falantes tienen menos derechos que los falantes d'otres comunidaes? Queremos el mesmu tratu institucional y el mesmu réxime de protección que tienen les demás llingües del Estáu", dicen.

"Nun ye ético tener más tiempu esta situación indigna pal nuestru patrimoniu cultural: si somos conscientes de la situación de desigualdá nun se pue esperar más. Hai que reformar l'Estatutu d'Autonomía p'aprobar la oficialidá y depués, con una Llei de Normalización, siguir un procesu adaptáu a la situación asturiana. Na llexislatura próxima, na Xunta Xeneral hai que poner remediu a un déficit democráticu que lleva demasiaes décades pendiente".