La esposición Mazcaritos d’Uviéu organizada pola Fundación Municipal de Cultura del Ayuntamientu d’Uviéu que recueye’l llabor de recuperación del Antroxu tradicional nel conceyu d’Uviéu fecha pol colectivu de Mazcaritos cola collaboración de Paraíso Local Creativo sigue abierta nel Patiu del RIDEA, Palaciu Conde Toreno, na plaza Porlier 6, n’horarios de 10 a 14h pela mañana y 17 a 21 horas pela tarde, hasta’l domingu 31 de marzu, qu’abre de 12 a 14h. Clausúrase la esposición a esa hora cola actuación de la bandina Turcipié, que vien saliendo cola comparsa del Antroxu carbayón. Un equipu de profesionales y aficionaos trabayen na recuperación del antroxu baxo la direición del artista visual Ánxel Nava. L’amuesa ta compuesta por fotografíes d’estudiu de gran formatu, obres de reconocida artista fotógrafa Elena de la Puente, con diseñu gráficu del diseñador Eduardo Palacios, y dos monitores con vídeos y semeyes de l’artista Cristina Busto y los fotógrafos Javier Ordás, Iván G.Fernández y Joaquín Álvarez, que recueyen los tres años “corriendo l’antroxu” pel barriu antiguo. Los Mazcaritos d’Uviéu inviten a la collaboración ciudadana pa recoyer memoria oral de persones mayores que tengan recuerdos de mazcaritos, antroxos o aguinaldos nel Conceyu d’Uviéu. El públicu podrá tamién apuntase a correr colos mazcaritos antroxos nel futuru, a los talleres infantiles, o a les actividaes divulgatives que quieren proponese a los colexos.
Ye posible facer una semeya cola “destrozona” que preside la esposición, regálase tamién un cartafueyu con postales de los personaxes de la comparsa y una típica careta de cartón pa los neños y neñes que visiten la esposición. Esta tarde del 29 de marzu, a les 19h, sal la comparsa de La Vieya del Carbayón. Según noticia de Constantino Cabal, l’Antroxu d’Uviéu partía la Cuaresma, con un ritual de la “vieya cuaresmera” que coincidía cola primavera. La comparsa, acompañada de la zanfona de Celia González, saldrá de la Fuente’l Caracol del Campo San Francisco a les 19h y va dir pel Paséu los Álamos, Plaza la Escandalera, esquina Uría –a la placa conmemorativa- y Plaza del Carbayón. Invítase al público de toa edá a ver el desfile, qu’acabará con una piñata pa los neños y una danza prima alredor del árbol tutelar de la ciudá.
