Los Mazcaritos d'Uviéu van correr l'antroxu estos díes pol barriu Antiguo, con estos horarios : 

2 de marzu, SÁBADU FRIXUELERU. Actu de Plantar la Vieya Plaza del Paraguas (18h)  De 18 a 22 h. Pasucais de música, baille y actuaciones. Itinerariu: POSTIGO, SAN JOSÉ, PLAZA DEL PARAGÜES, PLAZA DEL SOL, PLAZA L'AYUNTAMIENTU, CIMADEVILLA, MON, PLAZA LA CATEDRAL, ÁGUILA y GASCONA.

3 de marzo, DOMINGU GORDU. De 12 a 15h. Pasucais, música, baille y moxiganga.  Itinerariu: PLAZA DEL AYUNTAMIENTU, FIERRO, PLAZA DEL FONTÁN, PLAZA LA ESCANDALERA, SAN FRANCISCO Y PLAZA LA CATEDRAL.

4 de marzo, LLUNES GORDU. De 17 a 20h. Antroxu infantil. PLAZA DEL PARAGÜES y pasucais pel Barriu Antiguo.

5 de marzo, MARTES D’ANTROXU. De 20 a 24h.  PLAZA DEL AYUNTAMIENTO, PLAZA PORLIER (Moxiganga del Xuiciu al Pelele) PLAZA LA CATEDRAL, GASCONA y FONCALADA. Moxiganga del Entierru de la Sardina.

Los Mazcaritos d’Uviéu,  ye la mazcarada urbana que se facía na ciudá hasta primeros de sieglu XX. Píntala’l cuadru d’Evaristo Valle “Carnavala en Oviedo” de 1928. Prohibida pol franquismu creíase desapaecida pero siguió faciéndose pelos barrios y pueblos del conceyu. Los Mazcaritos corríen l’antroxu pidiendo l’aguinaldu peles cais. Toles personas entrevistaes, dalgunas mayores de 90 años, recuerden el so nombre tradicional: “Mazcaritos”. 

La mazcarada facía cantares y coples d’escarniu y dalgunes fueron famoses, como les coples del Coque que popularizó Jerónimo Granda. El Xueves de Comadres salían les muyeres col pelele. El sábadu plantábase la Vieya 40 días enantes de Pascua y se corríase l’antroxu  tres días y una noche: Sábadu Frixueleru, Domingu Larderu o Domingu Gordu, Llunes Gordu y Martes de Antroxu. A los 20 días, La Vieya partía la Cuaresma n'El Carbayón, un ritual qu'esti añu pretenden recuperar tamién los Mazcaritos. LA COMPARSA La comparsa ta compuesta por una serie de personaxes:

La destrozona, el so personaxe principal  ye un paisano antroxau de muyer o bruxa con escoba, los sábanos con ropa de cama, los zaparrastros con sacos y cencerros, el vieyu y la vieya, el cura y el diañu, la rollona y el neñu, el galán y la madama, la osa y los zíngaros,  Añádense a vegaes grupos de soldaos, zuavos, xitanos, moros y sopistes de la estudiantina. Guía’l ciegu de les coples  cola ciega de la zanfona o  col lazarillu, manda un capitán y carga la mula col aguinaldu. Canten coples y faen la comedia del partu la rollona col médicu, el xuiciu al pelele, con xuez, pregoneru  y guardies, o l’entierru la sardina, con cura, plañideres y enterrador.

La Murga o bandina de músicos acompaña la comparsa. La murga de mazcarites en solidaridá col movimientu feminista, tará compuesta esti añu esclusivamente por muyeres: Celia González (zanfona) Sara y Raquel (gaita y tambor), y el grupu Bandi Né (Martes d'antroxu y Sábadu 9 nel desfile oficial). Facía 80 años que nun se facía y munches persones mayores reconocen los vezos tradicionales de los mazcaritos.

La Comparsa foi recuperada va tres años pola asociación artística Paraíso Local Creativo, lleva participando n’alcuentros de mazcaraes, ente elles los Alcuentros de Mazcaraes de Valdesoto y esti añu participará por segunda vez nel Festival Internacional da Mascara Ibérica de Lisboa. Abrirá esti añu’l desfile del Antroxu qu’organiza l’Ayuntamientu d’Uviéu y cola collaboración de la Fundación Municipal de Cultura prepara una esposición sobre los personaxes y el procesu de recuperación del Antroxu tradicional de la ciudá.