Un añu más los Mazcaritos salen a les cais  y cuerren l’antroxu a la manera tradicional. La mazcarada d’Uviéu ye una de les mazcaraes asturianes y el colectivu ta trabayando dende va tres años na recuperación d’esti  patrimoniu cultural inmaterial escaecíu dende va ochenta años nel conceyu.

Hoy 28 de febreru, salen les muyeres colos panderos manteando’l pelele, símbolu del machismu dominante na cultura patriarcal. De 20 a 22 h., pasucais de música y baile. Itinerariu: POSTIGO, PLAZA DEL SOL, PLAZA L’AYUNTAMIENTU, PLAZA DE RIEGO, PLAZA PORLIER, PLAZA LA CATEDRAL Y GASCONA.

Les comadres diben per cases y chigres pidiendo l’antroxu pa facer la merienda, cantando coples d’escarniu y faciendo bailles pa dar entamu a la folixa nel tiempu del carnaval. Asina, pasarán les comadres de los mazcaritos pelos chigres del barriu antiguo de la ciudá.

Seguirá estos díes la Comparsa de los  Mazcaritos d’Uviéu corriendo l’antroxu pel barriu del Antiguo y Gascona.

El Sábadu Frixueleru,  2 de marzu, plantarán la Vieya a les 18h na Plaza del paragües. El Domingu Gordu, 3 de marzu a les 12h percorrerán el Fontán, La Escandalera y la Plaza de la Catedral.

El Martes d’Antroxu, 5 de marzu, de les 20h a 24h acabará la folixa antroxera col xuiciu al pelele y l’entierru la sardina.

La recuperada mazcarada carbayona empecipia a ser conocida na ciudá y reconocida internacionalmente. Esti añu abrirá’l desfile oficial del Antroxu y participará nel Festival Internacional da Máscara Ibérica de Lisboa.