La escritora Iris Díaz Trancho va presentar el xueves 28  d’abril, nel Centru de Cultura Antiguu Institutu de Xixón, el llibru de  rellatos Nome, editáu por Publicaciones Ámbitu. Nel actu, que va empezar
a les 19:30 hores na Sala de Conferencies del centru mentáu, va  intervenir, amás de l’autora, l’escritor y editor Antón García, que va  ser l’encargáu de facer la presentación de Díaz Trancho.

Los cuentos que formen Nome divídense en dos partes: «Tan cerca» y «Tan lloñe».
La primera ta compuesta poles narraciones que más cercanes a l’autora y al so mundu, cuestiones que-y toquen cerca, por familia o simplemente porque pasen n’Asturies.

La segunda parte compónenla histories que nun formen parte de la vida personal de la escritora, que pasen en cultures que nun tienen nada que ver cola d’ella.
Sicasí, tanto nuna parte como na otra, el paisaxe que presenta Díaz Trancho aseméyase al d’esos cuentos onde’l protagonista dexa’l mundu real pa internase, nun se sabe cómo, nel reinu de los seres fantásticos, onde’l tiempu y l’espaciu mándense per otres lleis.

En palabres del escritor y críticu Xosé Bolado, «dende “Nome”, [el testu] que da títulu al volume, percíbese’l enfotu d’enteabrir. Tomámoslu como una puerta d’embarque al misteriu o a la ambigüedá. A primeres, ¿ye una prosa o un poema? A ver quién decide si’l so xéneru ye relevante. Quedámonos cola so metáfora suficiente, o col nome de la so maxa, que nos conduz a un espaciu onde les lleis namái regulen los
pasos de la lluz ente les sombres. [...] Iris Díaz, con concisión, domina un tonu nel
que lo dramático sobrevién ya valtia les espectatives creaes. Hai fuercia nesa  sión, hai interés en que la imaxe xenere, enanche espacios, anque seyan pal dolor.

D’esa forma l’aire del conxuntu de rellatos faise sutil, ameno, llévanos del silenciu íntimu de los primeros, al llogru preciosu de “Cuando los perros lladren les ganes de glayar”, al dolor secu de “Tornar a casa” o, llueu, quedará nel maxín sobrecoyíu “Nun tocar”, pero, quiciabes, sobre toos crez, amodo, la semiente de “La llaguna del desiertu”, una xoya bien valiosa del cofre, multiplicadora de sentíos. Pues si evoca los rellatos de cuantayá, de cuando l’home contemplaba la fatalidá colos güeyos de los dioses
enteros, los que nunca nun s’encoyíen, nin siquiera ante lo escrito nos márxenes,
tamién da lluz a un mitu nuevu».