-        Los premiaos foron Manuel García Menéndez (Novela), Pablo Texón Castañón (Poesía), Lluis Aique Iglesias Fernández (Lliteratura Infantil y Xuvenil), Damián Barreiro Maceiras (Ensayu), Anxelu González Fernández (Cómic) y Higiénico Papel Teatro (Teatru Profesional) 

La Conseyería d’Educación y Cultura va entregar mañana a les 19:30 hores nel paraninfu de la Universidá d’Uviéu los seis premios lliterarios que’l Gobiernu asturianu convocó nel 2018 cola mira d’afitar la llingua asturiana como vehículu d’espresión lliteraria de primer orde. 

D’esta forma, va facese entrega del Premiu  Xosefa Xovellanos   de Novela (39.ª edición); el Premiu  Xuan M.ª Acebal   de Poesía (24.ª edición); el Premiu Máximo Fuertes Acevedo   d’Ensayu (24.ª edición); el Premiu  M.ª Josefa Canellada   de Lliteratura Infantil y Xuvenil (11.ª edición), el Premiu  Alfonso Iglesias  de Cómic (10.ª edición) y el Premiu  Nel Amaro   de Teatru Profesional (2.ª edición). 

Nel actu va dase a los gallardonaos una pieza artística en reconocencia a la calidá de la so obra y la so significación como aportaciones sobresalientes y innovadores a la creación lliteraria en llingua asturiana. La gala va cuntar amás cola actuación musical d’Héctor Braga. 

Información sobre autores y obres 

Premiu  Xosefa Xovellanos   de Novela: Manuel García Menéndez, pola obra El visitante impropiu 

Manuel García Menéndez (Uviéu, 1962) ye llicenciáu n’Historia pola Universidá d’Uviéu. Empezó la so trayectoria lliteraria publicando dos cuentos infantiles n’asturianu occidental, pola mor de la so vinculación familiar con Tinéu: Corcuspín el Rozcayeiru (1984) y Delina nel val.le’l Faloupu (1985). Depués de munchos años, publicó n’autoedición la novela La sienda del amigu feliz (2013). Nel 2018 ganó’l XV Concursu de cuentos curtios del Conceyu de Cangas del Narcea na modalidá d’asturianu occidental col rellatu  L’home que caéu nun bardión de lata  . El xuráu concedió’l premiu a la so obra El visitante impropiu, que describe nel acta como  una novela ambiciosa con gran oficiu narrativu que representa una propuesta poco habitual na lliteratura asturiana pol so trabayu d’ambientación minuciosu y brillante, amás de tener una trama construyida hábilmente  

.  Premiu  Xuan María Acebal   de Poesía: Pablo Texón Castañón, pola obra Allumamientu 

Pablo Texón Castañón (Felechosa, 1977), profesor d’enseñanza secundaria, ye collaborador habitual en diarios y revistes. Ganador de los premios de poesía Nené Losada Rico   (añu 2005) y  Teodoro Cuesta   (2007), la so producción poética en volume atópase nos poemarios Toles siendes, La culpa y la lluz y el recién Media vida. Poemes y cantares. Lletrista habitual de dellos grupos musicales de la escena asturiana, ye tamién responsable de la versión asturiana deXulia (2007), d’August Strindberg, pa Teatro Margen, y publicó nel 2013 Un corte de pelo, selección poética de Raymond Carver.   El xuráu concedió’l premiu al so poemariu Allumamientu al destacar  la so orixinalidá temática, amás de la destreza rítmica y la bayura estilística de los poemes, que-y dexen construyir una voz poética singular pa reflexonar sobre la paternidá dende una concepción esperiencial  

.  Premiu  Máximo Fuertes Acevedo   d’Ensayu: Damián Barreiro Maceiras, pola obra Asturploitation 

Damián Barreiro Maceiras (A Estrada, Pontevedra, 1984) ye periodista. Depués de ser redactor n’Asturies.com y nel selmanariu Les Noticies, amás de presentador en programes de televisión local, collaboró nel periódicu Diagonal Asturies, na sección  Escolinos   de La Nueva España y n’otros medios asturianos. Na actualidá trabaya na axencia de noticies Europa Press. Publicó les obres L’espeyu onde miranos (Premiu d’Ensayu Fierro Botas), Caleya Sésamu (Premiu d’Ensayu Máximo Fuertes Acevedo) y el llibru de divulgación Yo, la to llingua.   L’acta del xuráu reconoz na so obra premiada Asturploitation  la relevancia social del tema tratáu y la propuesta estratéxica que fai pal impulsu del sector audiovisual en llingua asturiana, documentada con minuciosidá y rigor  

.  Premiu  M.ª Josefa Canellada   de Lliteratura Infantil y Xuvenil: Lluis Aique Iglesias Fernández, pola obra Invisible 

Lluis Aique Iglesias Fernández (Sotrondio, 1967) ye llicenciáu en Filoloxía Inglesa pola Universidá d’Uviéu. Participó en dellos montaxes escénicos del Grupu de Teatru Universitariu de la Facultá de Filoloxía, ente ellos Lo que vio’l mayordomu, de Joe Orton, traducida pol propiu Lluis Aique en 1995. Tamién tradució al asturianu a Oscar Wilde con La importancia de ser Severu (2002). Ganador de dellos premios lliterarios, ente ellos el primer premiu del XIII Certame de Cuentos Curtios Valentín Palacios (2018), tien publicaos poemes y rellatos en revistes como Lletres Asturianes y Lliteratura. L’acta del fallu d’esti gallardón destaca n’Invisible, la obra premiada,  un tratamientu de temes d’actualidá con personaxes reales, con una bona estructura narrativa y un estilu lliterariu cargáu d’imáxenes simbóliques  .  Premiu  Alfonso Iglesias   de Cómic: Anxelu González Fernández, pola obra Cacique blancu 

Anxelu González Fernández ye un ilustrador de trayectoria profesional dilatada. Trabayó pa delles editoriales (Pintar-Pintar, Satori, Zander, Asturtoons) en proyectos de lliteratura infantil, proyectos educativos y cómics; imparte talleres d’ilustración y diseñu gráficu y tien la so propia empresa de creación d’imáxenes corporatives y publicitaries. Ente les obres presentaes, el xuráu decidió conceder el premio al cómic Cacique Blanco, destacando que se trata de  una propuesta innovadora no gráfico y narrativo, onde destaca l’usu espresivu del color pa conformar una historia interesante y desconocida  

.  Premiu  Nel Amaro   de Teatru Profesional: Higiénico Papel Teatro, por Hansel y Gretel 

Higiénico Papel Teatro cunta ventidós años d’esperiencia ininterrumpida y más de trenta espectáculos producíos y estrenaos, siempre con gran éxitu de públicu y crítica qu’avalen la trayectoria d’esta compañía, con un repertoriu ampliu que destaca pola diversidá temática y espresiva de les sos propuestes, marcaes por un sellu personal elegante que conxuga toques de humor, provocación y poesía. El compromisu cola calidá y el rigor de les sos producciones fai que la consideren como una de les compañíes de referencia na cartelera asturiana, con una repercusión nacional notable. Ente les cuatro obres finalistes, que se representaron a lo llargo del mes de payares nel Teatru Filarmónica d’Uviéu, el xuráu decidió por mayoría conceder el premiu al espectáculu Hansel y Gretel al reconocer nél  una adaptación fecha con muncha sensibilidá, humor y inxeniu, onde se mecen los personaxes del cuentu colos de la obra y los intérpretes, nun xuegu metateatral cenciellu y brillante. Too ello con un gran cuidáu llingüísticu  .