El conciertu presentación será na casa la cultura de Grau el sábado 17 de payares a les 20:00

José Martinez, o lo que ye lo mesmo “Ún de Grao”, presenta el so primer discu "Pelo Segao", nel que muestra la so visión personal de la tonada y d'otros palos de la música tradicional asturiana.

Dempués del so primer EP publicáu en 2016, esti moscón sigue col trabayu de xuntar o amestar la tonada y la nuestra tradición a otres corrientes, otros estilos, abrise a otres influencies y asina dexar que'l nuestru patrimoniu cultural vaya evolucionando y adaptándose a los tiempos.

Nel discu inclúyense tonaes, añaes y una habanera, cantares que ñacen del nuestru raigañu y que, al pasar peles manes de Ún de Grao entaman a comunicase con soníos propios del rock, armoníes que falen de jazz, de blues, y munches de les llingües que topamos na música d'anguaño.

Ye muncha la variedá de igües y d'enfoques, con una producción abondo trabayao, pasando del campu de lo íntimu a propuestes más arriesgaes con ecos de hard-rock.

Nel conciertu va tar acompañáu de Pepín de Muñalén coles flautes y el saxu así como Tony Cruz col contrabaxu.

La entrada de baldre.