Iniciativa pol Asturianu sofita la declaración de los Sidros y Comedies de Valdesoto como BIC de calter inmaterial pol so compromisu col idioma

“Dende la nuesa organización valoramos l’ilusionante trabayu fechu dende l’asociación “El Cencerru” al emplegar la llingua asturiana como vehículu de tresmisión de la cultura popular”

Diego Solís, vocal d’Iniciativa Pol Asturianu, fixo públicu’l sofitu de l’asociación a la declaración como BIC de calter inmaterial de los Sidros y Comedies de Valdesoto pol compromisu y usu de la llingua que faen nes sos actividaes y comunicaciones.

“Dende la nuesa organización valoramos l’ilusionante trabayu fechu dende l’asociación ‘El Cencerru’ al emplegar la llingua asturiana como vehículu de tresmisión de la cultura popular. Porque d’esta manera amás de potenciar la cultura tradicional de les mazcaraes ye una manera de mantener vivu l’asturianu y tenelu presente” añadió Solís.

El vocal d’Iniciativa pol Asturianu recordó que “amás el bon trabayu de l’asociación ‘El Cencerru’ fai que la nuesa llingua pueda sentise en diferentes puntos d’Europa como Bulgaria o Portugal dando en definitiva, visibilidá al idioma nun solo n’Asturies sinón tamién en tolos llugares que visiten”.
P’acabar, Diego Solís dixo que “dende Iniciativa Pol Asturianu animamos a l’asociación “El Cencerru” a continuar col so trabayu y a seguir mantiendo l’asturianu como un pilar fundamental na so llabor cultural.