Yolanda Alonso, conceyala de Cultura, entregó'l material güei pela mañana na Escuelina d'El Quirinal   Les neñes y los neños tienen de rellacionar el nome del llobu o la lloba, el xabalín o la  xabalina,  o la pega col so contornu como si fuere un rompecabeces    

Avilés.-El compromisu de la conceyalía d'Educación y Cultura d'Avilés pa cola llingua asturiana y la so tresmisión y conocencia pa lo más piquiñino de la casa, vese con programes como "Xugamos pa deprender". Entamó too l'añu pasáu, y per aciu de les Escueles Infantiles del Conceyu d'Avilés recibieron güei un material nuevu, consistente nun xuegu col que van deprender los nomes d'animales xabaces que viven n'Asturies, y rellacionalos col so contornu, como si fuera un rompecabeces.

  Yolanda Alonso, conceyala d'Educación y Cultura d'Avilés, fizo entrega del material güei pela mañana na Escuela Infantil Municipal d'El Quirinal, a la so direutora Nieves Sanz. Xunto a ella, Mónica Alonso, xefa de seición d'Educación del Conceyu, y Montserrat Machicado, responsable de la Estaya de la Llingua, que ye quien pon en marcha esta campaña "Xugamos pa deprender".  

L'oxetivu de la campaña ye que les neñes y los neños d'Avilés deprendan vocabulariu básicu n'asturianu gracies al xuegu. Asina, a cada Escuela de 0-3 dióse-y una caxa con material diseñáu pola empresa avilesina Signum, mui afayadizu pa la reciella, y que se lleva mui bien pa un sitiu y pa otru, peles clases de les Escueles d'El Quirinal, La Madalena y La Toba.   Na caxa hai ocho fiches con retratos d'nimales xabaces, col so nome n'asturianu: lloba-llobu, osa-osu, raposa-raposu, curuxa, puercuspín, xabalina-xabalín, pega y cascoxu. Neños y neñes podrán rellacionalos col so contornu nuna alfombra, onde les pieces encaxen como si fueren un rompecabeces.  

La campaña "Xugamos pa deprender" entamó l'añu pasáu alrodiu del Día Internacional de la Llingu Materna, el 21 de febreru. Avilés foi'l primer conceyu d'Asturies que preparó un material d'esti tipu y que lu dio a les tres Escueles Infantiles del Conceyu. Entós, rellacionao too con un pallabreru básicu d'animales de la casería. Esti añu la propuesta ye asemeyada, pero agora colos animales xabaces más conocíos de los que viven n'Asturies.    Yá l'añu pasáu, a la iniciativa de la Conceyalía de Cultura y Educación d'Avilés, per aciu de la Estaya de la Llingua, xuntáronse otros Conceyos asturianos, como Xixón, Siero, L.lena, Cangas del Narcea o Llanera ente otros.