Educación convoca los premios lliterarios 2018 n'asturianu y aprueba la convocatoria de subvenciones a medios de comunicación 

El miércoles 23 de mayu publicóse nel Boletín Oficial del Principáu d'Asturies (BOPA) la convocatoria de los premios lliterarios n'asturianu, Xosefa Xovellanos” de novela nel so trentésima novena edición; Xuan María Acebal de poesía na so ventésima cuarta edición; Máximo Fuertes Acevedod'ensayu nel so ventésima cuarta edición; María Josefa Canellada de lliteratura infantil o xuvenil nel so décima primer edición y Alfonso Iglesias de cómic na so décima edición. Estos premios contribúin a potenciar, consolidar y arriquecer la creatividá de la llingua asturiana nel ámbitu lliterariu. 

A estos premios, que tienen una dotación económica de 3.000 euros, pa cadún de los xéneros, pueden presentase les persones interesaes, siempre que nun fueren ganadores na anterior edición de cada modalidá lliteraria. Los plazos de presentación d'orixinales terminen el 3 de setiembre de 2018 nel casu del premiu “Alfonso Iglesias” de cómic, y el 17 de setiembre de 2018 pa les restantes convocatories d'estos premios. 

Tamién s’aprueba la convocatoria de subvenciones a medios de comunicación pa la normalización social del asturianu y, nel so ámbitu, del gallego-asturianu, en réxime de concurrencia competitiva. La cuantía total d'esta llinia d'ayudes ye de 90.000 euros. L'oxetu d'esta convocatoria ye la concesión d’ayudes económiques en réxime de concurrencia competitiva a empreses periodístiques, radiofóniques, televisives o d'Internet, poles inversiones realizaes na producción d'espacios onde s'utilice l'asturianu, o'l gallego-asturianu nel so ámbitu, bien de manera habitual n'informaciones xenerales, bien n'espacios periódicos y fixos, bien en programes estraordinarios d'interés especial, pero siempre que tal usu contribuya a la normalización y dignificación del usu social de la llingua y seyan espacios configuraos como propios del mediu de comunicación y asumíos por él. 

Van poder solicitar estes subvenciones cualquier empresa privada (persona física o xurídica) que seya titular d'un mediu de comunicación d'ámbitu asturianu y que tenga el so domiciliu social, establecimientu o delegación comercial nel Principáu d'Asturies.

El plazu de presentación de proyectos a esta llinia de subvenciones termina'l 20 de xunu de 2018, incluyíu.