L'asociación va anunciar el programa del festival na Casa de la Mocedá de Sotrondio, onde va facer un taller de rap y un tornéu de ping pong 

Vuelve'l Festival de Cultura Urbano de Samartín en 2018. L'asociación xuvenil Que Nun Apare! va entamar el sábadu 2 de xunu la segunda edición d'esti eventu qu’axunta música, deporte, cultura y educación. La programación completa va dase a conocer en rueda de prensa esti vienres 11 a les 18 hores na Casa de la Mocedá de Sotrondio.

Tres la presentación, va haber un tornéu de ping pong y un llaboratoriu de rap n’asturianu onde se va convidar a rapear a la mocedá del conceyu xunto a dellos intérpretes de la escena hiphop d’Asturies. El II Festival de Cultura Urbano de Samartín va tener llugar esti añu nel Parque del Florán y, anque tola programación va dase a conocer esti vienres, l'asociación xuvenil yá desveló que va haber un espectáculu de maxa, un taller de talla de madera y de madreñes, de break dance y de baille tradicional, un tornéu de baloncestu 3x3 y va sonar la música de Allanai Sound System y la TxusMa. 

Con esta nueva edición, Que Nun Apare! da continuidá al éxitu d'esti festival que tuvo la so primer cita'l 15 de xunetu del añu pasáu col enfotu d’enllenar el vacíu que dexó la non celebración de les tradicionales fiestes de La Llaguna. Una programación cultural y d'ociu diversa y na que la mocedá sía la protagonista, fueron les claves d'esti eventu autoxestionáu y ensin ánimu de llucru que se vuelve a celebrar gracies al sofitu popular y del comerciu y l'hostelería de Samartín.