Les andolines o andarines, son unos páxaros per  comunes n´Asturies.

Güei cuesta más trabayu alcontrales nes ciudades, pero en los pueblos entavía  puen vese volando per encima los tellaos.

 Esti páxaru gozó  siempre del beneplácitu de la xente. Según les nueses creencies, decíase que la mancha color coral que lleven nel pechu, ye la guella de la sangre de Xesús, al intentar quitai les espines de la cabeza cuando taba crucificau.

Por esti motivu, y considerá casi un ave sagrá. Matar a un animalín d´estos de forma intencioná, pué facer perder el ganao o a un ser queríu.

Enantes en los pueblos, la xente yera muy dá a preparar pa que les andolines ficieran los sos nieros. Non solo per el calter relixiosu, si non tamién porque yeren beneficioses pal ganao y les coseches, ya que comen gran cantidá de mosques y otros bichos.

Si quiés que una andolina faga el nieru na cuadra o nel tendejón de casa, lo primero que hay que facer ye que tenga bon acesu. Na cuadra basta con quitai un cristal de la ventana y dexar puercos los otros.

Dempués prepárase el llugar del nieru.

Pa eso ponense nes vigues  clavos grandes ,palinos o allambres pa que yos sirvan de asideru per les nueches. Yamién ye bueno poneyos tables o soportes pa que puean tener pel nieru.

Críen dos veces na temporá con cinco pitinos normalmente.

Les andolines  vienen dende la víspera de San Xosé y marchen en Setiembre pa Africa a pasar el inviernu. Concentrense nos tendíos llétricos o cañaverales marchando enantes que salga el sol, por eso la xente antiguamente creía que se escondien nel barru los pantanales a pasar el frío.

“Si del quince al venti de Marzu, nun ves la andolina, vas ver el campu blancu cmo la farina”