Avilés cellebra'l Día de la Llingua Materna con actividaes de promoción y espardimientu de la llingua asturiana

Avilés cellebra'l Día de la Llingua Materna con actividaes de promoción y espardimientu de la llingua asturiana

Inclui un conciertu del tenor asturianu Joaquín Pixán na Casa la Cultura
  
Prográmense varies sesiones de "bebecuentos" coincidiendo cola cellebración del 21 de febreru

Emprima la segunda fase de la campaña pionera de normalización pa neños y neñes de 0 a 3 años qu'entamó l'añu pasáu


La conceyala de Cultura, Yolanda Alonso, xunto col Direutor Xeneral de Planificación y Normalización Llingüística, Fernando Padilla, presentaron güei les actividaes que va desenvolver el Conceyu d'Avilés pa festexar el 21 de febreru, Día Internacional de la Llingua Materna. Na presentación de los actos tuvo tamién la responsable de la Estaya de la Llingua d'Avilés, Montserrat Machicado.

Les actividaes conmemoratives n'Avilés sedrán los díes 21 y 22. El miércoles a les 20:30 la ciudá acoyerá un conciertu de baldre del tenor asturianu Joaquín Pixán, acompañáu al pianu pol músicu Mario Bernardo. L'actu faise en collaboración col Principáu d'Asturies y sedrá nel auditoriu de la Casa la Cultura. Los artistes van interpretar Un cancioneru astuiranu pal sieglu XXI, con testos adautaos pol escritor uvieín Antonio Gamoneda. La entrada ye de baldre hasta completar aforu.

El Conceyu d'Avilés, per aciu de la Estaya de la Llingua, tamién tien programes varies sesiones de bebecuentos, que se van cellebrar nes Escueles del Primer Ciclu d'Educación Infantil de la ciudá y nes que participará'l conocíu actor asturianu Carlos Alba "Cellero".

Les sesiones, que tendrán una duración de 20 minutos, sedrán nes escueles y horarios que vienen darréu:

Día 21 de febreru. 10.00 hores. Primer sesión de bebecuentos na Escuela Infantil El Quirinal.
Día 21 de febreru. 10.30 hores. Segunda sesión de bebecuentos na Escuela Infantil El Quirinal.
Día 22 de febreru.  10:00 hores. Sesión de bebecuentos Escuela Infantil de La Madalena.
Día 22 de febreru. 11:00 hores. Sesión de bebecuentos na Escuela Infantil de La Toba.

Ye'l segundu añu que la Estaya de la Llingua trabaya coles escueles infantiles pa la normalización de la llingua asturiana. Avilés ye pionera col trabayu nesti tarrén, coles escueles de 0 a 3 años y nesti añu va siguir col plan d'aición col usu del material Xugamos pa deprender que se va centrar otra vegada nun nuevu tema: los árboles d'Asturies (texu, carbayu, castañal...)

La campaña consiste na distribución d'una caxa con un xuegu infantil onde neños y neñes podrán estremar los diferentes árboles asturianos y inclui una alfombra onde ta la forma del árbol col so nome y una pieza cola imaxen del mesmu. Asina, neños y neñes podrán rellacionar conceutos al mesmu tiempu que deprenden la llingua.

Per otru llau, dende qu'entamó esti añu 9 educadores participen nun cursu de llingua asturiana. Ye la responsable de la Estaya de la Llingua quien pon clase nun cursu  empobináu específicamente al ciclu infantil de 0 a 3. La formación termina'l 9 de mayu.


Día Internacional de la Llingua Materna n'Asturies


El Día Internacional de la Llingua Materna proclamólu la UNESCO nel añu 2000 y dende entós festéxase cada 21 de febreru pa facer alcordanza de lo importante que ye protexer y puxar pol multillingüismu. Les llingües propies, especialmente les minoritaries, las minorizaes y les indíxenes tresmiten cultures, valores y conocimientos tradicionales, cumpliendo una xera esencial na promoción de los futuros sostenibles.

N'Asturies, el motivu central de la cellebración ye poner la llingua asturiana y el gallego-asturianu nel sitiu que-yos correspuende como llingües maternes y como ayalgues culturales propies, qu'aporten calidá a la educación a tolos niveles col so usu, meyoren les capacidaes de comprensión y creatividá, al tiempu que sirven pa enriquecer les rellaciones sociales y  les estratexes comunicatives.

Dejar un comentario

captcha