Pueden participar tódalas personas matriculadas nos cursos de quintu ya sestu de primaria de  dalgunu de los centros educativos de Cangas del Narcea. Cada participante puede presentar una obra namái,  na variante occidental de la L.lingua ou na estándar.

Ha  premiase aquel.la obra inédita qu'a xuiciu del xuráu sea d'un valir literariu mayor.

La temática ía l.libre ya'l relatu ha  tener d'extensión una fuea cumo mínimo ya cuatro a lo máximo, con  presentación en DIN A4.

La obra vei presentase manuscrita.

Las obras nun van volvese a las personas participantes.

Las obras presentadas van ser expuestas ya usadas pol Conceyu en campañas de normalización social.

Las obras premiadas van publicase na páxina web del Conceyu de Cangas del Narcea.

Ha  premiase  con un bonu de 100€ pa gastar en material escolar al trabayu ganador ya con outru de 50€ al segundu clasificáu.

Los trabayos han presentase  no Serviciu de  Normalización L.lingüística (C/ Uría, 13, baxu, 33800 Cangas de Narcea) ou por corréu certificáu a la mesma dirección, primeiro del 20 de mayu del 2011, pídese a los maestros qu'a ser posible manden las obras participantes nun sobre por escuela, nél,  meteráse cadaguna de las obras presentadas firmada cono pseudónimu del autor/a ya, aparte,  outru sobre cerráu  con una fuea ande se detallen los datos riales del alumnáu que se presenta al concursu.

El xuráu ta formáu por varias personas con cargos públicos no Conceyu de Cangas del Narcea: Bibiana Martínez García, conceyala d'Educación ya Cultura del Conceyu Cangas; Noelia Rodríguez Menéndez, coordinadora cultural del Conceyu Cangas; Mónica Rodríguez Riesgo, responsable del Serviciu de Normalización L.lingüística del Conceyu Cangas ya Julia Gallego Murias, bibliotecaria del Conceyu Cangas.

Del resultáu del xuráu ha  comunicase a las personas interesadas por carta ya teléfonu.

Participar nesta convocatoria supón l'aceptación de las bases.