Al menos 343 académicos y personalidaes de la cultura francesa van publicar un manifiestu na revista Causeur la selamana entrante defendiendo’l derechu a “dir de putes” y condergando’l “sexu ensin consentimientu”. L’Asamblea Nacional francesa tien de decidir sobre una llei sobre la prostitución y la penalización de los clientes de les prostitutes al final del mes de payares. El proxectu ye tresformar una contravención nun delitu na nueva llexislación.

Los firmantes considérense “llueñe de ser los frustraos, perversos y psicópates descritos polos partidarios d’una represión oculta y dismulada en combate feminista”. Reclamen la llibertá de disponer del cuerpu d’una prostituta remunerada ensin ser molestaos. Ente los firmantes alcuéntrense académicos, escritores, periodistes y Richard Malka, ún de los abogaos del ex director del FMI, Dominique Strauss Khan.

“Escontra lo sexualmente correcto, nosotros creemos vivir como adultos”, diz el petitoriu. “Güei ye la prostitución, mañana la pornografía, ¿qué van vedar pasáu mañana?”, se pregunten. Baxo’l títulu “Nun toques a la mio puta. Manifiestu de 343 bastardos”, el textu tien el deséu de “molestar a les feministes de güei”. Llidéralu Frederic Beigbeder, director de la revista Lui.

 El manifiestu trata d’imitar el qu’escribiera Simone de Beauvoir en 1973 na revista Le Nouvel Observateur con 343 firmes pa defender el derechu al albuertu. Pero nengún de los firmantes almite esta vez si van o non “de putes”.