Dientro de la programación de La Mateína na que participa Paraíso Local Creativo nel festival Corrada Fest, los Mazcaritos d’Uviéu recuperen una vieya tradición del Conceyu: Les castañes de San Mateo. Les primeres castañes del añu, que se nomaben castañes calduñes, ufrecíense-y a San Mateo  nel día la fiesta, pa tener bona collecha nos castañales. Ye una vieya tradición que tien orixe medieval.  Acompañando con tambor y gaita a la Mateína, el personaxe que representa al chiringo socio cultural, van facer un pasucais y dar una vuelta a Uviéu, parando nos chiringuitos pa dexar unos oricios de castañes y desear a tol mundu bona collecha y felices fiestes.  Pasarán delantre de la Catedral, mercarán una paxarina, y al tornar a la Corrada del Obispu, fadrán una curtia moxiganga p’acabar la xornada con una danza prima y sentase a xintar el bollu de chorizu y la botella vino como manda la tradición. Los Mazcaritos d’Uviéu trabayen pa  recuperar vezos y costumes de la ciudá y son fieles a la tradición mateína.                                                               

Xente d’Uviéu, tambor y gaita. ¡Puxa San Mateo! 

Les Castañes de San Mateo. La Mateína, 21 de setiembre de 2018, de 12 a 14,30 hores.