Agora púnxose de moda la costura  pola serie televisiva basá nel llibru “Tiempo entre Costuras”.

Pero los oficios de costurera y modista , que nun son lo mesmo,  ( la costurera  solo cose y fai arreglos, la modista sabe facer patrones,) son per vieyos.

 Yera oficiu de muyeres,ya que no yera bien visto trabayar fuera casa en otra profesión y asina podíen ganase la vida cosiendo pa una patrona o poles cases.

Nos talleres había una oficiala, que yera la que dirixía los trabayos y les aprendices qu'amás de deprender l´oficiu cosíen pal taller. Estes yeren moces xóvenes dellos casos neñes.

Nun cobraben na y vegaes teníen que pagar una cuota pola manutención si taben agospiaes ellí. Les poces perres que ganaben veníen de les propines que yos daben cuando diben a entregar los encargos, llevándolos nuna tabla madera cubierta la prenda con papel de seda .

Facíense traxes y vistíos pa les clientes. Cuando más trabayu había yera per Ramos y les fiestes pues toes les que podíen permítiselo queríen estrenar ropa.

Hubiere  otru tipu de modistes y costureres, que dedicábense a coser peles cases.

En les mas poderoses teníenla fixa , trabayando pa ellos, faciendo-yos la ropa pa los rapacinos y pa la casa. Otres vegaes la modista diba un día a ca sitiu, y pasábase la xornada trabayando , faciendo los encargos encomendaos.Lo que más se facía yeren camises pa los paisanos, arreglar la ropa que quedaba pequeña , o “echar l'apañada” que llera arreglar el rotu d´una sábana faciendoi un remiendu con la tela d'otra vieya.

En les cases solía haber una maquina de coser pa trabayar con ella, pero munches vegaes  había que carretala, usando  una de rabil .

La máquina coser yera un luxu pa munches trabayaores  que nun podíen permitise comprar una,asina que  rentábenla a la casa por unos reales mensuales que pagaben relixosamente . Na aquella época les mas  famoses yeren : Singer , Alfa o Frister.

Tuvi la suerte de tener na mio familia costureres y modistes. Mio bisagüela Leonor , que de soltera andaba caleyando  cola máquina coser na cabeza. Y Mio güela Loya y la so hermana Rita que fueron mui buenes modistes llegando a facer traxes de novia.

Entovía alcuérdome cuando mio güela quixo enseñame a coser na máquina, daquelles que yeren de pedal y que difícil yera  dai l'impulsu pa que la máquina  nun fuera  p'atrás en vez de p'alantre cuidando nun romper l'agulla.

Güei coles máquines a motor ye una delicia amás de que lo faen too elles, ya qu'enantes  el pasillar  ,poner cremallera , bordar y rematar facíase too a mano. Anque na  Alta Costura  siguen faciéndose munches coses a mano pa dai valor a la pieza.