L´horru ye un elementu per importante na economía asturiana, sirviendo como almacén, onde se colgaben les riestres de maíz, ayos y cebolles, amás de guardase les patates, castañes y mazanes. Tamién les fabes, onde se metíen los güevos pa que se guardasen más frescos.

A vegaes usábense como  dormitoriu p'algún miembru  la familia o criáu.

L´horru defende les coyeches de la humedá y los ratones. Amás la propia estructura de la construcción permite la ventilación de los productos.

L´horru asitiase sobre los pegollos, columnes de piedra o maera, afitándose nes soleres, que son les piedres  que s'a sienten nel suelu.

Sobre´l pegollu va la muela , cuadrada o circular, que ye pa que los ratos nun puean  esguilar .

Sobre les mueles van puestes les trabes, que son les vigues que soporten la estructura del horru.

Les paredes nómense  les colondres y los lliños que son les vigues d´arriba. La escalera ta fecha en piedra pero nun llega enriba pa que nun puean llegar los bichos. La tenobia o talandoria ye una tabla horizontal que ta debaxo la puerta. Esta en veces taba tallá con figures protectores, Flores d´Agua, Trisqueles o símbolos solares. O la fecha en que se fizo l´horru o'l nome del dueñu.

El teyao taba fecho a teya vana . De teya na Zona Central y Oriente , de pizarra nel Occidente o paya nel Suroccidente.

Na Marina Occidental,  l´horru nomase cabazu, y ye paecío a los horros gallegos.

Según el númberu  de pegollos que tenga pué nomase horru (cuatro pegollos) o panera ( seis u ocho).

L ´horru o panera pué tener un solu amu o tar compartío por dellos vecinos, dividiéndolo per dientro con tabiques de madera.

L´espaciu debaxo  l´horru aprovechase pa tender la ropa o guardar  el carru o l´ aráu.